Memleket basshysy Nursultan Nazarbaevtyń bes áleýmettik bastamasyn elimizdiń árbir azamatty jyly qabyldady.
Bul týraly Din isteri jáne azamattyq qoǵam mınıstrligi uıymdastyrǵan dinı birlestikter ókilderiniń jıynynda aıtyldy. Jıyndy ashqan Din isteri komıtetiniń tóraǵasy Erkin Ońǵarbaev Elbasynyń bes áleýmettik bastamasy búginde el arasynda qyzý talqylanyp, jappaı qoldaý taýyp otyrǵandyǵyna toqtaldy. Memleket tarapynan halyqtyń ál-aýqatyn kóterýge baǵyttalǵan sharalardy dinı birlestikterdiń músheleri de sezinip, onyń ıgiliginen qalys qalmaý kerektigin eskertti.
Jıynǵa arnaıy shaqyrylǵan Ulttyq ekonomıka mınıstrligi makroekonomıkalyq taldaý jáne boljamdaý departamenti dırektorynyń orynbasary Aıgúl Ahmetovanyń aıtýynsha, Prezıdenttiń bastamalaryn júzege asyrý maqsatynda jol kartasy jasaqtalyp, Úkimette bekitilgen. Áleýmettik paket esebindegi bastamalardyń oryndalý merzimi men tetikteri de naqtylanǵan.
– Bastamalardy júzege asyrylý jumystary bastalyp ketti. Jol kartasy boıynsha negizgi 35 shara belgilendi. Endi bes áleýmettik baǵyt boıynsha Azamattyq, Bıýdjet jáne Salyq kodeksteri men 12 zańǵa ózgerister engizilmek. Úkimet arnaıy 6 qaýly qabyldaıdy. Barlyq jumystar boıynsha múddeli organdar aı saıyn esep berýge mindettelgen, – dedi mınıstrlik ókili.
Úndeýdiń 5 baǵyty boıynsha dinı konfessııa ókilderine Ulttyq ekonomıka, Bilim jáne ǵylym mınıstrlikteriniń qyzmetkerleri tıisti málimetter berdi.
Serik ÁBDIBEK,
«Egemen Qazaqstan»